សេអ៊ូល៖ ប្រទេសកូរ៉េខាងជើងបានបាញ់មីស៊ីលផ្លោងរយៈចម្ងាយខ្លីចំនួន ២គ្រាប់ចូលទៅក្នុងសមុទ្រនៅថ្ងៃព្រហស្បតិ៍ ទី៦ ខែតុលានេះ សំដៅប្រទេសជប៉ុន បន្ទាប់ពីនាវាដឹកយន្តហោះអាមេរិកបើកមកកាន់ដែនសមុទ្រឧបទ្វីបកូរ៉េមួយនេះ។ នេះបើតាមការចុះផ្សាយរបស់ Channel News Asia ។

ការបាញ់មីស៊ីលនេះគឺជាលើកទី៦ ក្នុងរយៈពេល ១២ថ្ងៃ និងជាលើកដំបូងចាប់តាំងពីកូរ៉េខាងជើងបានបាញ់មីស៊ីលរយៈចម្ងាយមធ្យម (IRBM) លើប្រទេសជប៉ុនកាលពីថ្ងៃអង្គារ។

ការបាញ់បង្ហោះនេះត្រូវបានរាយការណ៍ដោយអគ្គសេនាធិការចម្រុះរបស់កូរ៉េខាងត្បូង និងរដ្ឋាភិបាលជប៉ុន។

នាយករដ្ឋមន្ត្រីជប៉ុនលោក Fumio Kishida បានប្រាប់អ្នកយកព័ត៌មានថា៖ «នេះគឺជាលើកទីប្រាំមួយក្នុងរយៈពេលដ៏ខ្លី ដោយគ្រាន់តែរាប់ពីចុងខែកញ្ញា។ នេះពិតជាមិនអាចអត់ឱនបាន»។

ការបាញ់បង្ហោះនេះបានធ្វើឡើងប្រហែលមួយម៉ោងបន្ទាប់ពីប្រទេសកូរ៉េខាងជើងបានថ្កោលទោសសហរដ្ឋអាមេរិកចំពោះការថ្លែងនៅក្រុមប្រឹក្សាសន្តិសុខអង្គការសហប្រជាជាតិអំពី «វិធានការឆ្លើយតបតែមួយគត់របស់កងទ័ពប្រជាជនកូរ៉េលើសមយុទ្ធរួមកូរ៉េខាងត្បូង-អាមេរិក» ដោយលើកឡើងថា ការសាកល្បងកាំជ្រួចរបស់ខ្លួនគឺជាប្រតិកម្មចំពោះ ចលនាយោធាសម្ព័ន្ធមិត្ត។

នៅក្នុងសេចក្តីថ្លែងការណ៍ដែលចេញផ្សាយដោយក្រសួងការបរទេសរបស់ប្រទេសឯកោមួយនេះបានថ្កោលទោសទីក្រុងវ៉ាស៊ីនតោនចំពោះការដាក់ទីតាំងឡើងវិញនូវនាវាផ្ទុកយន្តហោះអាមេរិកនៅឧបទ្វីបកូរ៉េដែលថា វាបានបង្កការគំរាមកំហែងយ៉ាងធ្ងន់ធ្ងរដល់ស្ថិរភាពតំបន់។

នាវា USS Ronald Reagan និងនាវាវាយប្រហារដែលអមដំណើរត្រូវបានដាក់ពង្រាយឡើងវិញភ្លាមៗជាការឆ្លើយតបទៅនឹងការបាញ់បង្ហោះ IRBM របស់កូរ៉េខាងជើងលើប្រទេសជប៉ុន។

សហរដ្ឋអាមេរិកបានចោទប្រកាន់ចិន និងរុស្ស៊ីកាលពីថ្ងៃពុធថា បានអនុញ្ញាតឲ្យមេដឹកនាំកូរ៉េខាងជើង លោក គីម ជុងអ៊ុន ធ្វើរឿងបែបនេះដោយរារាំងការប៉ុនប៉ងពង្រឹងការដាក់ទណ្ឌកម្មរបស់ក្រុមប្រឹក្សាសន្តិសុខអង្គការសហប្រជាជាតិលើទីក្រុងព្យុងយ៉ាង ជុំវិញកម្មវិធីអាវុធនុយក្លេអ៊ែរ និងមីស៊ីលផ្លោងរបស់ខ្លួន។

ប្រធានាធិបតីកូរ៉េខាងត្បូង Yoon Suk-yeol បាននិយាយជាមួយនាយករដ្ឋមន្ត្រីជប៉ុន Kishida តាមទូរស័ព្ទនៅថ្ងៃព្រហស្បតិ៍ បានថា កូរ៉េខាងត្បូងនឹងធានាសន្តិសុខរបស់ខ្លួនតាមរយៈសម្ព័ន្ធភាពរបស់ខ្លួនជាមួយសហរដ្ឋអាមេរិក និងកិច្ចសហប្រតិបត្តិការជាមួយប្រទេសជប៉ុន។

លោកបាននិយាយថា នាវាផ្ទុកយន្តហោះអាមេរិកបានចូលដែនទឹកពីកូរ៉េខាងត្បូងកាលពីល្ងាចថ្ងៃពុធ។

ក្រុមប្រឹក្សាសន្តិសុខជាតិរបស់កូរ៉េខាងត្បូងបានព្រមានថា កូរ៉េខាងជើងនឹងប្រឈមមុខនឹងការឆ្លើយតបយ៉ាងខ្លាំងក្លាពីអន្តរជាតិជុំវិញការសាកល្បងនេះ។

រដ្ឋមន្ត្រីការពារជាតិជប៉ុន លោក Yasukazu Hamada បាននិយាយថា ទីក្រុងតូក្យូបានធ្វើការតវ៉ាយ៉ាងខ្លាំងជាមួយកូរ៉េខាងជើង ជុំវិញការបាញ់បង្ហោះកាលពីថ្ងៃព្រហស្បតិ៍ តាមរយៈគណៈប្រតិភូនៅទីក្រុងប៉េកាំង។

លោកបាននិយាយថា កាំជ្រួចទីមួយនៅថ្ងៃព្រហស្បតិ៍ទំនងជាហោះទៅរយៈកម្ពស់ប្រហែល ១០០គីឡូម៉ែត្រ និងចម្ងាយ ៣៥០គីឡូម៉ែត្រ ខណៈដែលកាំជ្រួចទីពីរមានរយៈកម្ពស់ប៉ាន់ស្មាន ៥០គីឡូម៉ែត្រ និងគ្របដណ្តប់បានចម្ងាយ៨០០ គីឡូម៉ែត្រ ដែលទំនងជាហោះហើរក្នុងគន្លងមិនទៀងទាត់។

កាំជ្រួចមីស៊ីលផ្លោងរយៈចម្ងាយខ្លី (SRBMs) ថ្មីៗបំផុតរបស់កូរ៉េខាងជើង ត្រូវបានរចនាឡើងដើម្បីហោះហើរលើគន្លងទាប ហើយមានសក្ដានុពលសមយុទ្ធ ដែលបង្កភាពស្មុគស្មាញដល់កិច្ចខិតខំប្រឹងប្រែងក្នុងការស្វែងរក និងស្ទាក់ចាប់។

លោក Hamada បានប្រាប់អ្នកយកព័ត៌មានថា «កូរ៉េខាងជើងបានបង្កើនការបង្កហេតុរបស់ខ្លួនដោយឥតឈប់ឈរ និងឯកតោភាគី ជាពិសេសចាប់តាំងពីដើមឆ្នាំនេះមក»។

អគ្គសេនាធិការចម្រុះរបស់កូរ៉េខាងត្បូងបាននិយាយថា កាំជ្រួចត្រូវបានបាញ់ចេញពីក្បែររដ្ឋធានីព្យុងយ៉ាងរបស់កូរ៉េខាងជើង។

កូរ៉េខាងជើងបានបាញ់កាំជ្រួចប្រហែល ៤០គ្រាប់នៅឆ្នាំនេះ។ កាលវិភាគកំណត់ត្រារបស់វាបានចាប់ផ្តើមនៅក្នុងខែមករា ជាមួយនឹងការបាញ់បង្ហោះមីស៊ីលដែលមានល្បឿនលឿនថ្មី ហើយបានបន្តរួមបញ្ចូលកាំជ្រួចរយៈចម្ងាយឆ្ងាយ SRBMs ត្រូវបានបាញ់ចេញពីរថយន្តផ្លូវដែក អាកាសយានដ្ឋាន និងនាវាមុជទឹកមួយ។ វាជាកាំជ្រួចផ្លោងអន្តរទ្វីប (ICBM) លើកដំបូងរបស់កូរ៉េខាងជើងចាប់តាំងពីឆ្នាំ២០១៧ ដែលបានបាញ់កាត់ជប៉ុន។

បើយោងតាមមន្ត្រីនៅទីក្រុងសេអ៊ូល និងវ៉ាស៊ីនតោន លើកឡើងថាសកម្មភាពនេះហាក់ដូចជាត្រៀមខ្លួនជាស្រេចដើម្បីធ្វើការសាកល្បងនុយក្លេអ៊ែរជាលើកដំបូងចាប់តាំងពីឆ្នាំ២០១៧។

សហរដ្ឋអាមេរិក និងសម្ព័ន្ធមិត្តរបស់ខ្លួនបានបង្កើនការបង្ហាញកម្លាំងយោធានៅក្នុងតំបន់ ប៉ុន្តែហាក់ដូចជាមានក្តីសង្ឃឹមតិចតួចក្នុងការដាក់ទណ្ឌកម្មអន្តរជាតិបន្ថែមទៀតពីក្រុមប្រឹក្សាសន្តិសុខអង្គការសហប្រជាជាតិ ដែលបានអនុម័តរួចហើយនូវដំណោះស្រាយហាមឃាត់ការអភិវឌ្ឍមីស៊ីល និងនុយក្លេអ៊ែររបស់កូរ៉េខាងជើង។

អគ្គរដ្ឋទូតរងអង្គការសហប្រជាជាតិរបស់ប្រទេសចិន លោក Geng Shuang បាននិយាយថា ក្រុមប្រឹក្សាសន្តិសុខចាំបាច់ត្រូវដើរតួនាទីស្ថាបនា «ជំនួសឱ្យការពឹងផ្អែកតែលើវោហាសាស្ត្រ ឬសម្ពាធខ្លាំង»។

កាលពីខែឧសភា ប្រទេសចិន និងរុស្ស៊ីបានវេតូការជំរុញដែលដឹកនាំដោយសហរដ្ឋអាមេរិក ក្នុងការដាក់ទណ្ឌកម្មបន្ថែមរបស់អង្គការសហប្រជាជាតិលើកូរ៉េខាងជើង ជុំវិញការបាញ់មីស៊ីលផ្លោងជាថ្មីរបស់ខ្លួន ដោយបំបែកក្រុមប្រឹក្សាសន្តិសុខជាសាធារណៈជាលើកដំបូងចាប់តាំងពីវាបានចាប់ផ្តើមដាក់ទណ្ឌកម្មលើទីក្រុងព្យុងយ៉ាងក្នុងឆ្នាំ២០០៦៕